Әлем әдебиеті

ЖАҺАН ЖЫРЛАРЫ ДЕСТЕСІНЕН

0

ЖАҺАН ЖЫРЛАРЫ ДЕСТЕСІНЕН

 

Жаңа буын – жас талап

 

Алматы қаласындағы Абылай хан атындағы Қазақ халықаралық қатынастар және әлем тілдері университетінің бір топ студенттері өздерінің көркем аударма саласындағы қабілеттерін қаламгерлікпен ұштастыра отырып, неміс ақын-жазушыларының шығармаларын қазақшалауға қадам жасаған екен. Бұл аудармалар тікелей неміс тілінен қазақшаланған. Жас аудармашылар неміс ақындарының өзіндік болмысын танытуға ұмтыла отырып, ұлттық поэзиядағы әсем өрнектерді де қамтуға талпынған. Бұл тұста Нұржан Айнабеков аудармаларын ерекше атаған жөн. Нұржан өлеңнің құрылымдық, пішіндік ерекшеліктерін сақтай отырып, қазақ тіліндегі поэтикалық тіркестермен жап-жақсы үндестіре алған.

Сондай-ақ Дина Мұратқызы мен Дана Дулатқызының да ізденістерінің жеміс береріне сенгің келеді.

Төменде жарияланып отырған аудармалар сол жас талап, жаңа буынның төл еңбектері. Болашақ ақындық, аудармашылық қадамдарына сәт сапар тілей отырып, оқырман қауымның назарына ұсындық.

 

 

Курт Тухольский (1890-1935)

 

ХХ ғасырдың басындағы аса көрнекті неміс ақыны. Берлинде дүниеге келген. Қоғам өміріне сын көзімен қарап, оның осал да әділетсіз тұстарын бүкпе-қақпасыз әшкерелеп отырған. Шығармаларын Теобальт Тигер, Петер Понте т.с.с. көптеген лақап аттармен жариялаған. 800 – ден астам өлең жырлардың, бірнеше өлең жинақтарының авторы.

 

Бәрі де сенің қолыңмен

 

Бар тірлікті ойнаттың

Біз үшін деп жүгіріп,

Қазаныңды қайнаттың,

Дастарқанды жайнаттың…

Бәрі де сенің қолыңмен.

 

Сүт пісірдің ішсін деп,

Тәтті жеу де – бір ермек.

Газет тасып жүрсең де

Үлгердің киім түгендеп

Ас қамдадың біз үшін…

Бәрі де сенің қолыңмен.

 

Кей сәттерде амалсыз,

Ашу қысып кеткенде

Аямастан тарттың сен

Шапалақпен беттен де.

Көрсін деп бізді тәрбие.

Өзіңнен туған сегіздің

Алтауы әлі өмірде…

Бәрі де сенің қолыңмен.

 

Өмірдің көріп қыр-сырын

Қартайыпты ол бүгін.

Сенің де соңың таяды.

Мен отырмаспын жылынып.

Маған онда батпас ас,

Егер сен жүрсең аш-жалаңаш түңіліп.

Рұқсат алу

 

 

 

Пікір қалдыру

*